【人老心不老】黃夏蕙認「勸喻」楊明惹非議：話係我供佢出嚟
蘋果日報 2020/09/15 14:29
黃夏蕙楊明沒有收入
現年86歲的黃夏蕙可謂「人老心不老」，經常為社會不公義的事發聲，日前應前新聞主播張寶華邀請，在其主持的YouTube節目擔任嘉賓。在節目上提到夏蕙姨早前在FB以長輩身份向涉酒駕的楊明作出勸喻：「身為公眾人物，疫情期間有燉湯唔飲，去飲酒，仲要玩醉駕！咪搞到個社會添煩添亂！我身為長輩，擺明係正面教訓你！」為此，夏蕙姨說：「我唔係批評，只不過係作為一個老人家，覺得呢個世界都好混亂，大家搵食都好艱難，何必飲酒呢？既然飲咗酒，點解要去揸車呢？傷害到自己，又傷害到人，所以只係勸吓佢，都勸吓其他人，喺呢個亂世要清醒啲。」
之不過黃夏蕙的簡單勸喻，竟然惹來不同的反應，「點知有啲人唔知，打畀我個仔，話你媽咪供佢出嚟，我都唔識楊明，點會供佢出嚟？都唔關我事，佢哋啲人又唔知，第一我唔識楊明，第二我講呢啲說話好公道，只係希望年青人唔好將自己前途毀咗，我又唔知佢撞車，唔係我供出嚟，只係作為一個老人家，勸佢唔好再做啫」。
一直以來，夏蕙姨很關心年青人和老人，亦曾經因為政府派錢問題，為演藝人發聲：「個個都派錢，點解演藝人唔派？我都做過演藝人，有乜嘢籌備，演藝人係義不容辭咁走出嚟，出錢又出力，到而家有啲仲係做緊，但係有啲冇得做，停晒工，點做呀？我哋都要食飯，養吓個家，但係咁多個月，而家連家都養唔到，既然你派得咁多，點解唔畀演藝人？呢樣我真係好唔明。佢嘅目的就話冇強積金，唔係話唔想買喎，65歲就冇得買，我而家都80幾歲，點買強積金？但係我而家都要做嘢，演藝人唔只係大明星，好似攝影師、燈光同梳化服，佢哋真係好慘，真係手停口停，唔明白點解林鄭唔顧吓佢哋？海洋公園又派幾多億，嗰啲又話幾多億，但係呢啲唔使話幾億，個個都好慘，冇得撈。」
言談間夏蕙姨坦言8個月冇收入：「我僥倖仲有飯食，但係睇餸食飯，太奢侈嘅嘢都已經做唔到，如果有能力都幫吓人。有啲人真係連飯都冇啖食，借又冇得借，大家都咁慘，點借？我咁大個女，都80幾年，未曾見過有咁淒涼嘅歲月，唔單止係我，全世界都係一樣，希望明日可以更好，點知原來明日係冇好過，越嚟越慘。總之大家要以和為貴，一齊努力，搞返好我哋自己嘅香港，人人有飯食就好喇，大家要溝通囉，世界上冇唔掂嘅嘢，香港仲有希望，因為香港人係好叻，雖然而家係冇咁靚，要由頭嚟過，不過明天會更好。」
後來，夏蕙姨亦有分享她的愛情故事，她直認胡百全是一生最愛：「我18歲識佢，我哋有6個仔女，為咗佢，我離開過香港幾次，又自殺過，乜都做過，但係冇後悔，我覺得好值得，有一個人可以咁樣為你，死嘅時候仲要俾人咁樣困住，想見最後一面都唔得，呢種生離比死別更加慘。」
夏蕙姨早前為張寶華的節目擔任嘉賓。（影片截圖）
夏蕙姨曾經因為勸喻楊明而遭非議。（FB截圖）
潘炳烈是夏蕙姨生命中第二個重要的男人。（資料圖片）
夏蕙姨表示自己不懂得政治，只不過要憑良心做人。（資料圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！