昨日是梅艷芳44歲冥壽，梅媽與梅啓明及數名友人往阿梅壽山村道故居，原擬入屋拜祭，不過被管理員阻止，只讓梅媽與梅啓明進屋。梅媽甚為不滿，拿出屋契高呼：「間屋我哋有份，點解唔入得？啲記者係我邀請嚟嘅。」梅啓明在旁說：「唔好阻頭阻勢。」管理員表示報警處理，10分鐘警員到場，表示只可在門外拜祭，且不可燒衣紙，梅媽等在門外擺起香爐及生果，但不理勸喻照燒紙紮祭品。

歌迷阿詩分頭悼念

梅媽邊燒邊哭說：「阿女，呢啲燒畀你食㗎，燒埋畀啲看更啦。」燒金銀衣紙時又說：「阿梅，你有怨報怨，有仇報仇呀，𠵱家燒多啲錢畀你使，你啲錢俾人呃晒。」至於阿梅徒弟何韻詩、羅君左及一班歌迷分別到九龍塘省善真堂拜祭阿梅，阿詩表示都是帶阿梅生前愛吃的食物來祭她，並向她說聲生日快樂。
此外，梅艷芳歌迷會昨晚在尖沙嘴富豪酒店舉行「珍惜聚會時」活動，設自助餐招待來自中、港、台、日等地200歌迷，並一同緬懷偶像，各地歌迷致送逾20花牌，羅君左也到場幫手售賣紀念品，現瑒還拍賣阿梅肖像油畫，收益將作為歌迷會舉辦慈善活動經費。
採訪：胡比、馬建華
攝影：陳俊強、仇志德