【全套服務】手機便攜攝錄套裝 多功能收音拍VLOG訪問都啱用
蘋果日報 2019/09/25 00:03
收音咪Shure
現時用手機拍片拍VLOG既方便，質素都已經算唔錯，但最棘手的一環其實是收音。大多手機收音咪質素認真麻麻，用藍牙耳機收音又多限制（如只能一人使用），Shure近期就推出一款便攜式攝錄套裝，當中有齊MV88+攝錄套裝、SE215專業隔音耳機（用作Mon聲）及AMV88-Fur防風罩（套在收音咪外阻隔風聲），一個套裝就有齊收音的基本裝備，對本身唔太熟悉器材的朋友都啱用。
整個套裝的核心是MV88+攝錄套裝，當中已包括Manfrotto小型三腳架、附熱靴插座的手機固定架、收音咪固定架、Lightning及USB-C連接線以及MV88+收音咪，多項配件都可收納在配件袋，攜帶都幾方便，安裝方面大概一分鐘就可完成。同一般收音咪有幾大分別？最大不同是MV88+收音咪提供多種收音方法，如可立體聲廣度收音（集中前方）、原始Mid-Side收音（正前方加左右聲道）甚至是單聲道雙向（前後方式擺放用左右收音），但就須要配合專用手機程式（Shure MOTIV Video）使用，在App內亦可調校收音品質及音訊增益，一般平價手機收音咪完全做唔到。
功能好多，但實際表現如何？記者就試過MV88+所有收音模式，使用單聲道雙向方式收音訪問，即使現場環境略嘈吵，記者同受訪者的聲音都收得幾清楚。轉換到原始Mid-Side收音，記者拍攝時在畫面左右移動說話，重播時亦能清楚聽到轉變中的聲音方位。實試後收音效果比想像中好，亦較記者本身DIY的收音裝置理想；不過記者就會偏向使用可伸縮的自拍棍取代Manfrotto小型三腳架，拍全身以至高角度取景都較方便。
售價：$2,688（MV88+攝錄套裝、SE215耳機、防風罩）
記者、攝影：布偉倫
編輯：鄒仲安
編輯：鄒仲安
MV88+收音咪提供多種收音功能，收音效果亦有專業水準。
手機固定架背後有位置方便捲上連接線，唔怕拍攝時連接線吊吊揈。
要用上專用手機程式Shure MOTIV Video才能調校各種收音功能及選項。