去年確診舌癌與淋巴癌嘅洪朝豐，接受切除部份舌頭及頸部淋巴手術後，今日精神奕奕現身秀茂坪出席「港台電視31流動電視廳」活動。洪朝豐左臉同頸部位置明顯較浮腫，但精神非常不錯及笑容滿臉，說話較以往慢，且咬字算清晰。

司儀問佢以前喺港台工作時嘅難忘事？洪朝豐話︰「喺離開電台嗰一晚，聽眾好熱情，有位老伯伯仲喊，好彩咁多年嚟有唔同聽眾懷念我。」司儀更正大家係記得佢。談及身體狀況，佢話︰「半年前接受切除舌癌手術，又喺頸切除24粒淋巴核，有四粒被感染，之後需要電療，我行咗一段比較艱難嘅路，但o依家未死得。」

洪朝豐接受傳媒訪問時，表示手術後患上口乾症，所以耐不耐要飲水，佢又指現時左邊頸會好硬，左邊膊頭會感覺麻痹，但唔影響休息。佢還指住左邊臉及頸位置話，表面疤痕已經癒合，但裏面仍然埋口中。初時試過影響食道，令佢好易飲水濁親，醫生指情況可以好危險，經轉介職業治療師跟進後，有所改善，佢話︰「開完刀好長時間，我只可以食流質食物，呢一個月可以食到啲固體，但要用粥或者茶去送，但麵包就食唔到，不過我最鍾意馬拉糕就可以用茶送。」

至於舌頭情況每日唔同，由初期舌頭肥大，以至阻礙上下牙齒咬合，到後來舌頭變打楝，才可以咬合牙齒同發音。現時仍然在休養中，有時會為雜誌寫專欄，佢話︰「慢慢過日子，會發現周圍嘅嘢，變得好溫柔同踏實，心情有種好暢快嘅感覺。」

精選娛聞，喺晒《娛果》
http://fb.com/appledailyent