何超蓮今日去到長沙灣星匯居出席慈善活動，同微型工作坊合作，安排同基層家庭一齊DIY盆栽，佢就表示：「之前搞嘅光影節活動，我哋幫呢個機構籌咗32萬，今日就嚟同班家長同小朋友影佢哋做嘅盆裁。」

問到佢近日都喺Ig貼相為舅母祈禱，噚日又再貼一張佢用步行架行路嘅相，超蓮就講番佢嘅病況：「舅母一路喺我屋企住，同我哋好深厚感情，一直都好健康，突然間入咗醫院，有隻病菌，搞到佢瞓喺床到又食唔得嘢，又冇胃口，醫生話佢肺積水，所以好擔心，之前恨緊酒店Project，一路去醫院睇佢聽報告，近排好啲，都落到床，行到一段路。

問到佢聖誕會唔會出外旅行，佢話因為舅母病情同Smile with us HK有好多義工活動，打算會留喺香港：「因為佢入咗醫院，我都喊咗好多日，我好細嗰佢已睇住我大，所以聖誕咁濃厚屋企氣氛，都係陪屋企人緊要，同埋我哋好多聖誕義工活動，要去探老人院，計劃喺街派禮物，所以嚟緊三個周末都會好忙，同埋會同明愛搞聖誕活動，會送暖畀小朋友，所以冇時間去外地。」

更多娛聞，喺晒《娛果》
http://fb.com/appledailyent