女東主追賊遭「撻生魚」: 佢日日偷我嘢偷到我驚
劉女士在香港仔成都道一個短期租舖售賣玉器飾物,事發周二近傍晚時分,案中賊人於下午4時多已進入店舖,逗留兩個小時至下午6時多才離開。劉女士指賊人為一名慣匪,「黑黑哋,肥肥哋,幾壯健,大約40歲」,所以賊人入舖後,她便份外留神,監視其一舉一動。
當賊人離開店舖時,劉女士發現他偷了玉器,於是追出大喊:「『你啲嘢未畀錢,畀返我啦!』佢唔肯畀咪同我鬥搶囉!」糾纏期間,劉女士力氣不及賊人大,遭對方「撻生魚」摔在地上,「我唔夠佢嚟,跌親個頭,整爛埋隻撈(勞力士手錶), 隻勞力士家陣應該值9萬幾蚊,成個殼爛晒,唔行(運作)啦,全部爛晒啦」。
劉女士稱,賊人上一次偷去她2,000多元的玉器,今次偷去價值280元的玉手鈪,「佢日日偷我嘢,日日偷我嘢,偷到我驚囉,偷我啲玉器囉」。劉女士當日被賊人摔跌後,拒絕送院,繼續返回店舖開檔。
「暈陀陀,一坐低就見暈,想嘔,朋友畀救心丹我食,食完就好返啲囉。」劉女士稱,在香港仔開舖之前,已在觀塘瑞和街開玉器舖超過30年,但老舖因疫情及貴租而執笠,於是改租短期舖,盡量將存貨賣出清貨套現。她表示,家人都希望她退休休息,但因不捨得將貨物全數捐出,所以才繼續做生意。對於今次追賊遭遇,她表示「以後都唔敢追賊」。
女事主劉女士在香港仔成都道一個短期租舖售賣玉器飾物。
女事主劉女士在香港仔成都道一個短期租舖售賣玉器飾物。
劉女士當日被賊人摔跌後,拒絕送院,繼續返回店舖開檔。網上片段截圖
-----------------------------
你敢爆,我敢獎! 立即Signal 63836568、
WhatsApp 《蘋果》24小時爆相爆片熱線
-----------------------------
-----------------------------