代表台灣出戰亞運嘅跆拳道索女選手楊淑君，當日因為俾評判判佢比賽時唔合資格而取消佢出賽，結果引起軒然大波，好多台灣同胞都戥佢唔抵，加上楊淑君樣貌標致，結果一炮而紅，唔怪得吸引唔少人想簽佢加入娛樂圈，不過佢就表明：「我覺得進演藝圈就是要做大咖（主角），做不了大咖很可憐，所以我寧願不要進演藝圈。」果然似足運動員咁有雄心。

陪睇醫生做推拿

其實楊淑君同娛樂圈都幾有淵源，除咗佢本身之前影過啲性感靚相十足明星咁騷34D身材之外，因為佢前男友、同樣係跆拳道高手嘅朱木炎，曾經被影到同女F4成員之一嘅Fanny撐枱腳。朱木炎喺04年嘅奧運攞過金牌，當中佢同楊淑君被視為天作之合，可惜最終分手收場。至於楊淑君現任男友，就係同佢並肩出戰嘅教練劉聰達，當日楊淑君喺亞運被out後狂喊，劉聰達馬上喺旁邊安慰，結果就揭發原來佢哋蜜運中。
日前台灣傳媒就影到楊淑君同劉聰達靜雞雞拍拖，男方揸住電單車同楊淑君遊車河，兼且陪佢去睇醫生做推拿，表現好細心，其間兩個仲情不自禁擁抱攬腰，其實同一般嘅情侶都冇乜分別。