外界一直有個睇法，就係天文台台長雖然係李本瀅，不過掛幾多號風球嘅話事權，卻在另一位李先生手上，今次鮎魚轉向唔吹嚟香港，無數網民認定又係李氏力場發揮作用嘅結果，因此即使天文台幾日前預測鮎魚會吹正香港，個颱風最終都行歪咗，搞到天文台唔會掛八號風球。鮎魚滑不留手，難怪李台長都捉唔到路。
鮎魚唔嚟香港，轉向北上，呢個戲劇性嘅路線移動，究竟李氏力場起咗幾多作用呢？八方無從揣測，不過facebook上李氏力場個群組，加入者越來越多，噚晚突破13,000人，係咪反映小市民寧可信其有盲目迷信呢？大家自行判斷。
李氏力場威力無窮，有人甚至開始膜拜呢股神秘力量，周末已安排節目嘅人，竟然齊齊祈求李氏力場全力將鮎魚拒諸門外。打唔成風，未來兩日假期唔會冇着落嘛，否則風球高高掛，浪費晒雙休日。一般打工仔好想鮎魚臨門，因為有機會多一日假期，家陣鮎魚離開，八方在facebook見到有人化悲憤為食慾，揚言要劏幾條鮎魚祭旗。