JYP事務所嘅老闆朴震榮近日同旗下新女團TWICE齊齊做模特兒，拍攝一輯「朴震榮校服」嘅廣告，廣告中朴震燦戴上黑超，個樣好似欣賞緊TWICE嘅身材一樣，而TWICE成員就穿上條裙超短嘅校服，佢哋又擺出挺胸收腹嘅甫士，而標語更有「剪成短裙吧！SheddingSkirt」、「用外套夾緊！束腰外套」等廣告詞語。

由於該海報有貼喺高中學校嘅門前，就連校服品牌嘅官網都標榜係「朴震榮JPY'sThin灰姑娘Project」，又畀學生通過網上宣傳該廣告，擺明係針對10多歲青少年愛上網而喺網上銷售嘅策略。

對於校服公司有咁嘅做法，京畿道保育廳保健老師們就大表唔同意，又話：「唔提出問題就唔當作問題，所以我哋要提出問題。」某保健教師更草擬「社會性制約要求書」，指到呢個廣告對正值成長時期嘅孩子嘅影響，話：「校服裙點解要剪成sheddingskirt？校服點解要着成束腰束胸式。無論係sheddingskirt定係束胸束腰都係突出女性性魅力嘅衣服，着上呢種校服嘅模特，仿佛就喺酒家，或者包廂嘅服務員一樣。」

又寫到：「為咗仿傚女團，標準體型嘅青少年已經強迫過度減肥，部份學生們患咗低體重症、免疫力下降、厭食症、貧血等，健康上亦都出現問題。教師們認為呢個廣告對0依家成長緊嘅學生嚟講係唔適合。」

而JYP方面就回應：「本公司對於大眾對旗下藝人代言嘅校服廣告所產生嘅憂慮亦都深表同感，喺同廣告代言公司商討後，決定採納各界嘅指教，針對廣告進行全面嘅修改，目前已推出嘅廣告亦會全面收回。對於藝人代言嘅任何廣告，將會進行更徹底嘅探討同確認，以確保相同嘅情況唔會再重複發生。」