當年今日
關於我們

【互助互勉】大讚C朗係最佳健身導師 佐真娜:同佢一齊操會覺得羞愧

蘋果日報 2020/06/13 05:00

C朗基斯坦奴朗拿度佐真娜

祖雲達斯前鋒基斯坦奴朗拿度(C朗)身體有幾弗相信各位球迷都清楚,不過其實要練成咁樣嘅身體係需要下唔少苦功,就連女友佐真娜都畀C朗嘅健身精神影響到,學識點樣去練出最佳嘅身體線條。最近佐真娜接受訪問時就話,呢段疫情期間自己一直都會同C朗一齊健身,不過因為C朗太過努力,令到自己初頭會覺得有啲羞愧,但係家陣就好鍾意同C朗一齊操練,仲話佢係最好嘅健身老師。
佐真娜喺隔離期間都定期會喺IG擺自己健身嘅相片,佢仲話臀部係自己最鍾意鍛煉嘅部位,有留意開嘅球迷都會留意到相入邊嘅佐真娜好鍾意大晒自己嘅「蜜桃臀」。至於自己之所以會咁勤力健身,就當然關C朗事,佐真娜就提到早幾個月同C朗返去馬德拉島隔離時,自己會同呢位祖記前鋒一齊健身:「一開始要同C朗一齊健身,其實真係有啲羞愧,想像吓你要同C朗喺同一個地方健身嘅感覺。之前佢會返去球會訓練嘅時候,我已經習慣咗自己喺屋企鍛煉。」
不過佐真娜就話經過呢幾個月一齊健身嘅日子,自己已經愛上咗同C朗一齊操練,仲讚佢係最好嘅健身導師:「後來我開始鍾意同佢一齊健身,佢會不斷激勵我,成為我最大嘅動力。C朗一般會喺朝早同下午鍛煉,佢對足球真係好投入,當然健身方面佢都做得好過我,但係我就擁有一位最好嘅老師(C朗),每日我都係佢身上學到唔少新嘢。」
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
------------------------------
《體蘋果》陪你睇波講波
https://www.fb.com/appledailysports
empty
佐真娜提到初期與C朗一起健身時,自己會感到羞愧。
empty
佐真娜又表示自己最愛鍛煉的部位是臀部。