現年44歲嘅佘詩曼（阿佘）大豐收，憑劇集《延禧攻略》入面嫻妃一角，喺內地人氣急升。啱啱過去嘅除夕，阿佘終於可以放下手上工作，難得放假休息，於是就約埋經理人、陳欣健女兒陳早茵，連同一班友人去咗中環，出席楊其龍搞嘅倒數派對。當晚派對主題係功夫武術，同場仲有楊其龍兩位家姐楊諾思同楊玳詩、混血模特兒Amanda S.等。

照足dress code

陳早茵噚日喺Instagram貼咗唔少當晚嘅派對相，阿佘喺造型上相當認真，照足大會嘅dress code打扮，以一身《龍門客棧》嘅俠女造型亮相，一面冷若冰霜，不過下一張相佢已經忍唔住同班朋友大笑。事實上對過往喺無綫都有拍開古裝劇嘅阿佘嚟講，當然毫無難度。同行嘅陳早茵就以粵語片嘅「龍劍飛」打扮出現，兩個人都chok住不停擺甫士畀大家影相，唔少網民都有畀like，大讚阿佘造型好靚又可愛。

陳早茵之後連環出咗三個帖文，當中仲搵到化妝師幫佢化一個炯炯有神嘅眼妝。佢形容自己同出席派對嘅朋友都是「crazy people（黐線友）」，更表示由於古裝服飾冇袋，所以部手提電話唔可以跟身。

此外，前日踏入新一年，阿佘喺微博貼出多張着上紅噹噹靚衫嘅相，留言：「新的一年，新的開始，定個新目標，努力奮鬥吧！」充滿正能量。
撰文：馮仁昭