當年今日
關於我們

BoA勁爆電視框妖男展鴻圖
日韓青春偶像猴擒上位

蘋果日報 2004/01/23 00:00


新一年開始,當然最好送舊迎新,為自己定下來年大計。踏入猴年,唔少日韓青春偶像,對新一年定下好多願望,好似佐藤江梨子發憤要做才女、成宮寬貴同BoA都好希望事業可以有更好嘅發展。
佐藤江梨子自編自導
同唔少由水着出身嘅日本女星一樣,佐藤江梨子好想喺自己走紅之後,證明畀人睇自己並唔係胸大冇腦,銳意表現自己嘅才華。佐藤寫新年願望時,寫住「女KUDOKAN」,意思原來係要做女版嘅日本才子宮藤官九郎,想學人做埋導演同寫劇本。

成宮寬貴扶搖直上
妖男成宮寬貴唔止着衫好有自己嘅特色同個性,佢個人原來都好有文學修養,好似佢寫猴年願望嗰陣,佢就畫咗把紙扇同寫咗句日文,當中「末廣」兩個字唔係要反轉廣末涼子,而係扇子嘅意思,喺日文中重可以解作「逐漸展開」,佢希望今年可以大展鴻圖。

BoA突破規範
經常日韓兩邊走嘅BoA,近年真係好勤力工作,佢話自己重keep住搵黑人老師教跳舞,不過,佢認為自己唔會滿足去年嘅成績,會更加努力喺自己嘅歌唱事業中有更多突破,所以佢畫咗啲音符又寫上個Wide字,最搞笑係佢畫個電視機上有自己個大名,幾乎掙爆個電視㖭。

鈴木惠美伺機發圍
二人少女組合Juemilan成員鈴木惠美,論知名度同受歡迎程度唔高,不過佢勝在夠博,影賀年相嗰陣,唔止着套色彩鮮豔奪目嘅和服去到寺廟取景,重好認真咁搵隻真馬騮擒喺膊頭合照。如果佢繼續肯博,可望年內有得發圍。鈴木話:「見到monkey令我想今年過得好funky!」