高志森以春天舞臺劇製作有限公司行政總裁及總監身份，今日去到中華總商會公佈今年國慶文藝晚會及國慶青年音樂會詳情，國慶籌委會文體表演主任霍震霆亦親身到場支持。今年有份參與十．一晚會香港藝人包括有陳潔靈、孫耀威，晚會司儀由陳百祥及陳貝兒擔任，而翌日青年音樂會，就會有沈震軒、糖妹及韓國組合BTOB CLC等參與演出。

噚日山竹襲港冇影響今日活動，高志森話：「全日喺屋企睇電視同工作，當山竹最接近香港時，家住30樓，感覺到暈浪，間屋喺度搖持續咗兩個鐘，後來爬咗上床唔敢郁，個心好唔安樂，不斷聽到救護車聲音，望落街都淨係一啲救護車來往同拯救行動，好敬佩香港公職人員。」

好多巿民都對山竹過後政府安排有意見，高志森就有另類睇法，佢透露今早七點幾出門時親眼目睹罕見狀況，順利邨沿途啲人行路落去彩虹地鐵站，因為受到冧樹影響，啲人要行出馬路，佢話：「從來未見過咁情況，相信政府估計唔到冧樹阻路咁嚴重，所以未可以安排巴士行走，如果唔係情況會好癱瘓，真係牽一髮動全身，所以啲人就去晒坐地鐵，負荷唔到，呢個係經驗教訓，非戰之罪，對上超強颱風溫黛至今已經幾十年，今次香港冇傷亡已經係好慶幸。」

精選娛聞，喺晒《娛果》
http://fb.com/appledailyent