褻瀆歌神癈柴政府民望崩潰 - 李八方

蘋果日報 2004/07/05 00:00


特區廢柴政府真係冥頑不靈,不但連六百萬市民都得罪足七年,連港人偶像嘅歌神阿Sam,都多次悍然作出褻瀆。許冠傑開演唱會,私人打本,同呢個政府營造祥和氣氛,點知就俾廢柴政府各部門恩將仇報,以演唱會超時為理由,晚晚罰款,埋單要罰歌神共百幾萬!
許冠傑演唱會晚晚踩多粒零鐘,現場觀眾熱情夾輕鬆,尤其係六月三十日晚,開夜啲,加埋通宵睇歐洲盃,第日七一遊行都少啲人。阿Sam間接幫緊特區政府,點知康文署語帶恐嚇,喝令許冠傑「後果自負」,激到幕後老闆丘亞葵大怒,話下次就改去會展做維港匯!
許冠傑同丘亞葵扯火,大有道理。冇錯,演唱會係超時,但附近嘅酒店有冇住客投訴?凌晨直落係咪有民建聯嘅慶回歸古典舞滙演跟住排緊上場?呢個政府七年敗政,燒炭跳樓,搞到六百萬人愁眉苦面,有歌神吹雞,搞活氣氛,市民難得咁開心,展現多兩粒鐘嘅歡顏,有乜罪過,要惹起特區政府嘅嫉妒心?
阿董超時又要賠幾多?
演唱會超時就要罰款百萬,咁請問人哋無綫直播香港電影金像獎,阿董上台演講,一講就唔收掣,搞到節目超時、司儀尷尬,程序大亂,電視台廣告收入受損失,更激起四百多宗市民投訴,無綫商譽受影響,咁特區政府又應該賠番幾多百萬?
廢柴政府搞維港匯,一炮浪費一億,啲騷派飛都冇人睇,好嘞,人哋阿Sam本土偶像登場,紅館十幾二十場鑊鑊滿,普天同慶,又要俾你罰,罰咗嘅錢,就用嚟補貼維港匯嗰一億,究竟係乜道理?簡直係荒謬連篇!
阿Sam演唱會,氣氛一片歡欣,市民睇到好開心,廢柴政府就識得叨光,高官爭住到場現身做攝石人,企圖借歌神嘅樂曲,推高自己嘅民意支持度。許冠傑為表大方,咁都冇計,重犧牲色相,焗住咀吻局長廖秀冬,廢柴政府可謂執到。歌神唔寄張單去政府總部收熱吻錢,反而要罰成百萬?笑話!
支持許冠傑,還歌神尊嚴,還我市民歌迷公道!



傳真︰2623-9278
電郵︰[email protected]