近期憑港視劇《選戰》躋身男神行列的王宗堯，吸引妹豬的電力無用致疑，原來他家中亦有兩位貓界小男神，同樣是八個月大的8仔及Tigger。雖然外貌與男神同樣超萌，不過經過非科學測試，兩位小男神的電力遠不及王宗堯，令男神失威。王宗堯自認是貓人，希望將來的女伴愛他之餘，同樣愛貓，各位貓系妹豬，收到未？

日前，男神王宗堯帶同兩位小男神8仔及Tigger接受訪問，平日罕有出門的牠們，甫到埗既緊張又興奮，細心的王宗堯為牠們準備自家水兜及大量玩具，但生性怕醜的Tigger似乎不多領情，四圍亂竄，更搞笑躲到梳化後面，要王宗堯又抱又錫才能稍稍安撫。為測試兩位小男神的電力如何，8仔及Tigger接受汽球靜電測驗，曾接受測試的貓貓最高記錄可以吸住7、8個小汽球。可惜輪到牠們測試的時候，8仔及Tigger竟然一個都吸不到。王宗堯無奈說：「話哂你哋都係小男神喎。可能佢哋好少出街，平日喺主場會叻啲，有朋友上嚟屋企都會主動撩人玩。」王宗堯指相對養狗，養貓比較配合這行的生活方式，他說：「佢地可以自已喺屋企，唔使出街，好方便打理，而且以前女朋友鍾意貓，自己搬咗屋之後終於有機會養。」

王宗堯的8仔及Tigger是領養的，原本他只是暫養，後來索性成為牠們的主人，雖然牠們只是普通小花貓，但王宗堯視牠們為心頭肉，他說：「有佢地真係變左貓奴，同事叫我唱K都要返去睇下佢地先，點知抱抱下就瞓左，搞到我唔敢郁，腳痺都唔敢郁。佢地真係好可愛，會叫我起身，會同我一齊瞓，最搞笑係佢地趁我瞓左幫我個Hi-Fi轉歌，仲較埋大細聲添。不過有次都真係好驚，因為而家個屋主覺得唔靚唔想裝窗網，有日起身個心突然離一離，原來8仔爬緊上最高隻氣窗，而家都諗緊點解決。」他坦言因為兩隻寶貝貓，工作都盡量留在香港：「行開一日都好掛住，如果第時真係要離開香港一段時間，希望到時有女朋友，兩公婆輪流照顧。」王宗堯又謂希望將來的女朋友同樣是貓人：「愛我同樣都要愛貓。」