副總理吳儀被稱為「中國鐵娘子」，事關佢鐵面無私兼好好火氣，日前同歐盟官員公開爭辯大發雌威，佢主力監督全國食品安全水平，搞到地方大小官員有得震冇得瞓，近日南巡，廣州即雷厲風行掃蕩偽冒劣貨品，連導演張堅庭廣州間表哥茶餐廳都受牽連。
張堅庭幾個月前殺上廣州中山三路開分店，可能間舖又新又大兼有特色，竟然俾廣州官員睇中。知情者同八方講，大約兩個月前，有市政府幹部去到茶餐廳，透露年底可能有中央要員南下廣州體察民情，幹部提出可否到表哥茶餐廳巡視，高官駕臨梗係倒履相迎，高興都嚟唔切啦。

點知應承後先知大把手尾跟，有關方面幾乎每日派人落舖巡查，有夥計私下向八方吐苦水，話老闆要求高，所以佢哋搞衞生特別嚴格，但都俾人抽秤。「喺飯市繁忙時間，地面有一支牙籤，佢哋（衞生官員）見到都批評唔夠衞生。」
呢啲係港式茶餐廳特色，阿姐呼喝縮起腳畀佢掃地，係港人集體回憶，我哋當係寶，八方對內地幹部唔識貨感到好可惜。除咗突擊巡查，幹部又要求表哥茶餐廳出示所有食品來源證明同員工健康證書，睇吓有冇用劣質貨，員工亦唔可以有病痛。「連我哋冲奶茶嘅茶葉，喺香港邊間公司買上嚟，佢哋都要查。」
廣州地方官咁緊張洗太平地，前日終於露口風，話吳儀到廣州時可能到「表哥」處嘆杯奶茶，據聞廣州市委書記朱小丹前日更率領大隊到「表哥」視察，其間有人訓示員工：「你哋要打醒十二分精神！」又要求原本11點先開門做生意嘅茶餐廳，要提早喺朝早8點準備，隨時迎接吳儀。
「表哥」夥計捱過兩個月幹部地獄式特訓，又捱眼瞓提早返工嚴陣以待，點知吳儀噚日冇嚟到，大家當堂鬆一口氣。廣州官員誠惶誠恐，一來怕咗吳儀官威，二來因為早兩個月，吳儀喺上海微服出巡，事後點名批評台灣品牌永和豆漿衞生條件不合格。食肆俾副總理批評搞衞生不力事小，上海官員形同俾人公開摑一巴丟架事大。後來間豆漿店被指係假店，係咪有人想轉移視線不得而知。
「表哥」老闆張堅庭話，歡迎吳儀隨時巡視，又話唔介意官員諸多要求，市政府好歡迎佢哋投資，「唔緊要啦，當係訓練吓員工，提高衞生標準。」呢啲樣板戲，八方認為吳儀唔睇好過睇，中國就係衰在冇人敢講真話，共幹連安排上級巡視一間茶餐廳都要弄虛作假，吳儀出巡又點會睇到真相？要打假，第一打呢啲狐假虎威嘅官員先啦！