陳欣健今日喺新城接受由薛家燕主持嘅節目《開心大派對》訪問，講到佢最近有份演出嘅熱爆4K網劇《反黑》，口碑載道，陳欣健好開心咁話：「出到街，個個都叫我『張SIR』。」佢又指呢個角色特別之處在於同個仔(由陳國坤飾演)嘅父子情，大家之間雖然有恨，但內裡亦存在關懷同內疚，跟佢現實生活中，同女兒關係差唔多，佢話：「所以我同小龍演嘅時候，我係好真心。」佢仲透露點擊率已達11億：「以全香港團隊、全香港主題、全香港故事，能夠有咁多人去睇，係一個滿足感。」

會唔會拍第二季﹖陳欣健話：「我打咗畀導演，叫佢諗定我點樣出現，如果有咩冬瓜豆腐，回魂又好，報夢又好，回憶又好，佢話已經諗通晒，每個角色都有佢嘅一條線；其實最感動，係拍完之後，小龍同佢太太黃伊汶安排我哋去布吉旅行，因為佢哋同我個女好朋友，我想叫個女一齊去，我就冇晒尷尬啦，我又老人哋一截，但我個女死都唔肯去，於是我一個人去咗，有日佢哋捉我去泳池邊，話有禮物送畀我，點知原來係我個女出嚟，呢班人真係好有心思，好尊重前輩，好尊重呢個行業，呢啲就係我哋香港電影界嘅將來。」