甄詠珊今日喺婚紗展行騷，由於佢16歲開始做模特兒，所以著過婚紗超過2000次。問佢有冇著到好麻木？佢話：「唔會，每次都有唔同主題，今次主題係森林仙子，我好期待王子出現，不過我想要青蛙王子。」問到王子出現未？佢表示未出現，就連婚紗店老闆都話要介紹男仔畀佢識，甄詠珊話：「最緊要係接受我好忙，因為我成日唔喺香港，0依家開拓緊內地市場。」

對於近日網上熱傳一對新人向一位化妝師走數，甄詠珊話：「有聽過，我唔係咁清楚，又唔在場，我覺得公說公有理，婆說婆有理，我唔會畀意見講邊個啱邊個錯；其實我以前都做過10年化妝師，化妝師要喺需要嘅時候，一定要出現，要醒目，有時見到新娘喺台上喊，化妝師要stand-by，可能化妝師見唔到，新娘就要出聲，所以雙方有溝通會好啲。」有冇試過被走數？佢話：「未試過，反而新娘喊住咁多謝我，話化得佢咁靚，其實結婚係開心事，盡量大事化小，小事化無，唔好影響開心事嘅發展。」