喺舊年，天王黎明（Leon），唔做天王轉做打工仔，同毛記合作，加埋「腦細」林日曦幫雀巢咖啡拍廣告，講黎天王演嘅「阿明」入「腦細」房要求加人工，仲要唱埋《情深咖啡未曾飲》，最後成功感動到「腦細」加佢100蚊呢個咁感人故事，呢個廣告嘅成績好到爆，點擊至今已累積到460幾萬同8萬幾個分享。

去到今年，「阿明」同「老細」又出場喇，廣告開頭就係，「阿明」入「腦細」房送手信，仲要「腦細」坐喺單車上面同埋攬住「阿明」條腰，呢個有少少「斷背」嘅劇情，只係廣告嘅開頭，之後就到「高級Intern」劉江出場喇。

劉江今次玩自殘想用原子筆拮自己，之後嘅劇情就梗係「阿明」唱歌啦，今次佢就唱出改編自《對不起我愛你》嘅《對不起我愛越南啡》，精采嘅點係黎天王完全唔介意自嘲，連喺1991年出席華東水災唱《對不起我愛你》走音都攞埋出嚟玩。

唔好以為有劉江同黎明就已經好勁，因為最後仲有特別大嘉賓現身，就係林夕以總經理身份出現，一出到嚟仲話佢哋啲改詞歌好夾硬，笑佢哋唔識填詞，仲有鬧人叫「阿明」同「老腦」去做嘢。