黃紫盈今年初為網站拍攝旅遊特輯《盈遊世界》到過德國，日前再獲德國旅遊局邀請，代表香港去慕尼克出席國際峰會，會上仲見到嚟自150個世界各地嘅代表，一齊交流推廣旅遊心得。

除咗開會，大會安排紫盈喺度假勝地上巴伐利亞州（Upper Bavaria）遊湖，夜晚又觀星，紫盈話入住嘅酒店房對正個湖，朝早仲可以睇埋日出。

紫盈今日接受《蘋果》電話訪問時話：「冇諗過今年可以去兩次德國，今次去仲見番好多舊朋友，又有機會同唔同地方媒體做交流。」紫盈一直覺得歐洲過聖誕好有氣氛，佢呢次旅程，當地已經有晒聖誕裝飾，佢話行到邊都咁開心，為食嘅紫盈又食咗熱狗：「德國嘅熱狗係最好味，佢哋將條腸煮到熱辣辣同香脆，食落去特別好味。」紫盈話除咗有口福，仲隨團參觀咗一間為奧斯卡頒獎禮製造特制黃金紙嘅造紙廠，認識當地文化。