亞視前高層盛品儒和老婆蔡一鳳（Michelle）的前家傭Narcelles Liverty Villanueva，去年9月離職前在大廳被查行李時，遭僱主發現她疑偷走價值10萬元的戒指，經審判後，今日在東區法院被裁定罪名不成立並當庭釋放。

女傭Narcelles Liverty Villanueva上庭時左腳紥上繃帶，當她獲悉無罪釋放，隨即在庭上嚎哭，並和前任僱主鍾女士激動相擁。鍾女士指女傭曾在她家中打工兩年，稱讚對方在其家工作期間表現良好，非偷懶之人。由於Narcelles Liverty Villanueva簽證過期，最後由法庭直接送到入境處辦理手續，未知會否立刻遣返菲律賓。

案情指去年9月，蔡一鳳因覺得Narcelles Liverty Villanueva偷懶又出錯決定解僱她，被告隨即提出即時離開，變相放棄6千元薪金。在檢查行李期間，Narcelles Liverty Villanueva被僱主，即控方發現行李一個袋中，跌出一枚屬於蔡一鳳、價值10萬元約5卡的橄欖形鑽石戒指，蔡一鳳隨即報警處理，被告否認盜竊罪。

今日主理法官判決時，質疑控方證供不可信，加上案發15日後控方才能提供CCTV片段，中間明顯有不連接位，相信有刻意隱瞞其他畫面。另一方面Narcelles Liverty Villanueva被解僱後執好行李，也有拍照給前僱主鍾女士，打算離開蔡一鳳家後暫住在前僱主家中，促見前主僕關係建立良好。

未有現身法院的蔡一鳳獲知結果後，接受《蘋果》訪問時說：「咁誇張？乜嘢理據？」對於有閉路電視拍到由外傭行李搜出那枚戒指，蔡一鳳坦言：「偷咗嘢，現場捉到都可以無罪釋放。呢個（判決）真係好恐怖。僱主毫無保障，真係好驚嚇。人證物證都有，Video都有，咁都可以無罪釋放？雖然已經被扣押咗幾個月。但係呢個唔能夠彌補佢偷嘢嘅過錯。如果係咁，以後啲工人偷嘢，可以話有其他同房工人擺啲嘢插贓佢，甚至仲可以話僱主插贓嫁禍佢而脫罪。」

對於法官的判決，蔡一鳳續說：「我覺得嗰位法官好好，但唔知佢係基於咩論點會咁樣判，可能係證據不足，好想知道。不過提醒僱主要多加小心財物，呢啲咁唔誠實、狡猾、蠱惑嘅工人，希望唔會有下一位港澳僱主受害。」問她會否上訴？蔡一鳳續說：「我應該冇時間去上訴，同埋我係作為證人出庭，上訴與否要警方決定，如果警方覺得要上訴咁我都唔介意配合嘅，不過覺得為咗咁嘅人，浪費社會資源唔係咁好，可能直接遣返仲好！」蔡一鳳坦言最擔心是其他人有樣學樣，會對僱主造成嚴重影響。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！