政府將於日內公佈針對一手新樓的空置稅，消息指有機會為兩倍應課差餉。中原集團創辦人施永青接受本報訪問時表示，即使早前政府推出徵收三成辣稅都沒有對樓市造成太多影響，故相信空置稅影響更微。而且二手市場沒有限制，政黨亦不會贊成，直言一手樓空置稅措施只是「形象工程」。

施永青指，「你地成日話政府同發展商官商勾結，政府就展現下夠膽向發展商開刀囉。但幫唔到港人上車的，因為而家樓價唔係跌少少就買得起，有年輕人話樓市跌一、兩成買唔起、跌三、四成都買唔起，跌夠一半先買到，但到時金融市場都頂唔順啦。」

他認為空置稅後立即出現的現象為發展商先不賣手上的樓花，轉而清倉已入伙的樓盤。「而家發展商賣的樓有排都未入伙，發展商見邊樣要收稅就賣邊樣先，通常都係貨尾、「賣淨蔗」，有啲望墳有啲望垃圾房，咪焗你買嗰啲囉。」他亦認為香港發展商好積極賣樓，「發展商賣樓花要另外申請，但仍然不厭其煩咁申請就係想早啲賣樓花，仲話佢唔積極賣？我細個就專鬥氣架喇，阿Sir要罰我就功課都唔鬼交啦。我就按章工作，唔鬼申請賣樓花啦。」

施永青認為空置稅存在隱憂，怕會弄巧反拙：「香港住宅空置率唔高，以歷史角度講而家係嚴重偏低的，國際水平來講香港亦係好低，發高燒食退燒藥就會退燒，但係都無發燒食咗藥都係98.6度。」他更打賭，「出現空置稅後空置少咗，你就成功；出現空置稅後空置無少，仲增加咗，即係收來都無用啦。立此為照，你一年後嚟睇下，而家就3.7%，睇下有冇機會變3.5%，抑或上返4%，我自己就認為無咩效果。」

有指推出空置稅，發展商為了散貨，於定價上會沒那麼進取，施永青認為，「無咁進取都唔會平，因為地價升咗，發展商攞塊地去補地價都係好貴，政府自己又唔肯收少啲，咁地產商賣咗樓唔係收工唔做，仲會買返塊地去賣樓，即係你賣完麵包都會買返麵粉，如果你賣麵包仲平過麵粉，咁檔生意點做落去。」

施永青認為，更有效令樓市降溫的方法是政府於地價上著手，令整體定價降低。另外於私人市場中撥出部分土地，作為港人上車盤，不受投資因素、外來因素影響的本地民生市場，去幫助未有樓的港人上車。如果沒有這個措施，單靠私人市場是無法幫到香港人。

記者：陳寶恩