歐霸盃附加賽同樣喺周五抽籤，今季好似玩無限金錢大事擴軍嘅AC米蘭（上圖紅黑衫），就會對馬其頓球隊舒肯迪捷；英超有朗尼壓陣嘅愛華頓，就會對克羅地亞球隊夏德！
歐霸附有成22個對碰，總共44隊咁多，N咁多隊波之中當然係以AC米蘭最搶眼啦，因為佢哋呢個夏天買咗成10個新兵，仲傳緊有興趣買埋迪亞高哥斯達，又留得住「新保方」基安盧基當拿隆馬，梗係有睇頭。佢哋周四喺歐霸外第三圈主場2:0贏CS卡拉奧華大學，兩回合合計贏3:0過關，而附加賽會鬥馬其頓球隊舒肯迪捷。不過，由中資擁有嘅AC米蘭傳來壞消息，話佢哋嘅借貸有問題，所以目前邦路斯同埋碧基亞雖然已經完成加盟儀式，不過其實仲未正式轉到會，但係教練蒙迪拿就拍晒心口話下場就會見到佢哋兩個。

愛華頓遇夏德

至於有「月巴」朗尼加盟嘅愛華頓（下圖），呢個夏天同樣喪買人，當然希望喺歐霸盃創一番功業啦，佢哋禮拜四喺歐聯外第三圈有朗尼、卡拉臣同米克堅尼上陣下，作客1:0贏路梳比洛，兩回合合計贏2:0晉級，附加賽就會對克羅地亞球隊夏德。兩回合賽事將會喺八月17號同24號舉行。