吳若希同胡鴻鈞噚晚去到太古城，出席萬聖節溜冰派對夜活動，擔任表演嘉賓。兩個人都屬於星煥唱片嘅歌手，對於無綫吸納星煥歌手、成立「星夢娛樂有限公司」，吳若希話知道咗消息之後，有同老闆何哲圖（Herman）傾過，佢話：「詳細仲傾緊，傾新公司模式，前路係明朗，亦都信任公司，星煥係我management同埋簽咗歌手合約，仲有三四年約。」

至於係唔係會順利過渡？吳若希就話唔太清楚，因為仲要傾細節，但係覺得方向係明朗，而且加入TVB係好事，因為TVB係大台，亦都可以有好多機會，佢話：「我想邁向前一步，想拍劇，一路都想，有啱自己工作都想做，應該唔會太多競爭，以出碟計，我都係星煥嘅師姐嚟。」咁快準備爭凳仔喇？

胡鴻鈞嘅經理人本身就係TVB，所以佢就覺得冇影響，反而0依家係「親上加親」，佢話：「歌手會多機會，對樂壇係好事，相信TVB係公平嘅平台，每個歌手都可以上。」佢仲直認一直都係「親生仔」，佢話：「0依家仲好，溝通多啲，多咗人都冇所謂。」

對於鄧智偉離開無綫，胡鴻鈞表示同對方冇合作過，但大家都算認識，對方仲畀咗一啲音樂上嘅意見佢，相信以後都會仲有機會合作。