戰後建築外型不如戰前建築般華麗，但保育團體及建築學者均指不應純以「靚同唔靚」或「夠唔夠老」去評定建築物價值，有學者指戰後建築與社會有強烈連繫，是解釋殖民地政治局勢的珍貴證物；團體認為古蹟辦專家小組過去在評核現代建築時曾受到質疑，建議針對戰後建築評審改革或擴大專家小組。

建築歷史學者黎雋維稱戰後建築多屬現代主義建築，「講究用線條，無任何裝飾，深藏不露嘅美學，比起古典建築難啲見到佢嘅特色。」他指不應以「靚或唔靚」評定其價值，「有人話佢唔靚，保育嚟做乜，我覺得好錯誤，甚至古諮會都有呢類說法，例如嘉頓。」

他指中環郵政總局及荃灣法院均屬殖民時代公共建築，能解釋當時局勢，「建築物屬粗獷主義，英國響二戰後對殖民地強調務實嘅管治模式，甚至用嚟對抗共產主義，俾人知資本主義建築都為人民設想。」黎稱郵局外型具功能性，「佢外牆每一層都對照番內部間格同功能，如最底圓拱形係門口，上一層呼應室內2層高大堂。」至於拆卸中的友邦大廈亦具價值，屬首座以預應力結構興建的建築物，即在水泥內用鋼筋去加強結構，大廈內部無柱，與美利大廈相似。

活現香港共同創辦人祁凱達指不應以年份評定建築價值，「唔係100年前就勁過或靚過50年前」，如近40年歷史的紅磡體育館社會義意重大，「佢係個倒轉錐形，入面無柱，建築上幾高難度，亦係流行文化地標。」他建議現時負責評審的古蹟辦專家小組應作改革，因小組僅由5人組成，過去不少決定曾惹爭議，如有小組成員曾將皇都戲院與漢墓比較去質疑其價值。

古諮會主席蘇彰德指對建議持開放態度，稱若為戰後建築評審訂新標準，亦應討論是否由同一批專家小組評審，「係咪都係同樣嘅專家？定係新專家？先定下標準，再睇咩專家可以畀到最多意見。」

記者　鍾雅宜

-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX