德甲班霸拜仁慕尼黑啱啱喺球隊嘅歐聯名單加多咗一位球員，但佢竟然係上季尾已經退休嘅門將史達基，到底拜仁喺度搞邊科？

原來咁係因為拜仁嘅正選門將紐亞受傷，最快要到出年先復出，根據歐洲足協（UEFA）嘅規定，如果任何球隊嘅A隊名單上有兩位門將因為長期受傷未能上陣，球隊係有權去揀多位球員做替補。於是拜仁就搵嚟今年已經36歲、上季尾退咗休嘅史達基幫拖。

其實史達基依家都仲係拜仁嘅人，負責喺球隊全新嘅青訓學院幫手搞守門員訓練，拜仁今個夏天喺中國同埋新加坡嘅季前賽，亦都因為紐亞以及烏里治齊齊受傷，要由史達基把關。