台獨重金屬樂團「閃靈」未獲入境處批出工作簽證，無得參加「我們正在音樂節」演出，《香港01》訪問咗主角、閃靈主唱兼二胡手林昶佐（Freddy），呢位2016年代表台獨政黨「時代力量」勝出立委選舉嘅歌手，喺訪問中親述同香港嘅一段緣，不過唔少人睇晒全篇訪問，先發現「亮點」原來係文末嘅「編者按」。

訪問林昶佐篇文題為〈台灣重金屬樂閃靈演前簽證未批　主音嘆斷港台人民感情〉，文末特別加咗句「編者按：香港01一貫立場是反對台獨」，呢句唔係「一貫」會出現嘅「編者按」真係搶晒fo，旋即惹嚟網民熱議，最多人問點解又要威又要戴頭盔？前傳媒人潘小濤喺Facebook發文指，「報道新聞竟然要宣布傳媒機構立場？世所罕見，惡例一開，根本不可能報新聞！報台灣大選，申明反台獨；報美國新聞，申明反美……。瘋狂的香港政治正確新聞機構！」曾任記者、現於中大新聞與傳播學院任講師嘅譚蕙芸，喺Facebook轉貼《香港01》相關文章，反問：「點解報新聞要聲明自己政治立場？」

一句「編者按」惹嚟爭議，浸大傳理學院新聞系前助理教授杜耀明又點睇？杜生回覆時形容《香港01》咁做係「除褲放屁，認真多餘」，話大家都知道傳媒做人物訪問，唔代表支持受訪者立場，指即使中共喉舌《文匯報》、《大公報》訪問民主派，都唔見有類同《香港01》嘅做法，認為係前所未見，指此舉令人覺得新聞同言論自由要符合國家所定嘅條件，「唔符合新聞自由嗰個要求」。

八方問過《HK01》執行總編輯戚本業，佢表明只係一貫立場表達，強調佢哋同時有訪問具爭議性嘅事，唔覺得有違反任何規矩，反問其他傳媒有冇搶先訪問呢啲涉嫌台獨份子？佢重申公司容許記者自由選取訪問對象，希望外界包括評論員留意傳媒現有嘅報道空間。（八方按：八方一貫立場是反對又要威又要戴頭盔）

而當事人林昶佐亦喺Facebook轉載《香港01》嘅專訪，除咗留言「香港是香港人的，大家一起加油！有朝一日我們香港見！」，亦特別提到專訪內文嘅「編者按」好「很神奇」，繼而幽默一番：「本粉專也編者按好了：本粉絲專頁一貫立場是支持台獨」。