響美國遇上大型Case，不時見到位身穿黑色老西、外形猛過《無間道》劉華嘅西裝友到場，仲抽住個裝滿高科技儀器嘅巨型皮箱。呢個皮箱係美國國防部法證武器，專門搜括手機內犯罪證據，7秒就可還原手機內偷拍的相片，今日終於有機會俾各位大開眼界。不過，香港法證專家表示，「還原器」須輸入每款手機系統，而香港就有4,000多款手提電話，要全面使用，都幾大工程㗎。

記者：陳國輝　
攝影：陳偉強

最頭痛：
用手機偷拍裙底

劈頭第一句就問：「究竟咩叫電腦法證？」來自美國國防部嘅專家RON就解釋：「舉個例，當發生咗一單地鐵手機偷拍裙底事件，如果疑犯將手機入面啲相全部Del晒，電腦法證就盡量將資料還原！簡單講就係用高科技儀器偵查及分析，案件中IT元素嘅線索！」
電腦法證專家要利用佢哋將案情收集，再重組，藉以緝拿一啲採用高科技手法犯案嘅IT罪犯。
嘩，聽落超高深，其實各位已經用緊，例如PDA、Notebook、MP3機、光碟、記憶卡……等數碼產品，都好可能成為偵破案件嘅重要線索。
雖然呢招叫以盜易盜，但道高一尺、魔高一丈，本港電腦法證專家凌先生就話：「手機犯案最難搞！」
凌先生保守估計，坊間手機型號多達4,000幾款，如果想套取手機裏面嘅資料，首先要將每一部新手機嘅Software更新落法證工具，佢形容咁做法「好大工程」。

讀取已Del資料搵證據

3大「法器」解構

除讀取手機資料用嘅法證儀器，仲有3種經常用嘅工具，以下就為大家介紹吓。

絕緣箱　防駭客

將調查緊嘅IT證物通通放進去，佢最大作用係防電波干擾，與外界隔絕，即使存放Notebook，駭客亦不能遙遠控制電腦。

絕緣袋　阻隔電波

經絕緣袋包實嘅細小證物，例如手機、藍芽設備等，全部唔會接得通，確保入面嘅證據，如SMS、電話記錄等不受影響。

法證硬碟　回復資料

可以分析出硬碟入面嘅資料、證據，有冇俾其他人做過手腳，就算係一啲已受破壞嘅數據，亦有機會將相關資料回復。

專家教4招網上自保

電腦法證專家仲教大家點樣防範IT罪犯。政府廣告成日都話，要保護個人資料免被盜竊。究竟乜嘢方法可有效保護自己嘅資料？凌先生話所謂保護，其實係個人安全意識，想加強呢一方面，教育最重要，佢仲即場介紹4種實用技巧畀大家，記住喇！

Update防毒軟件

「好多人以為裝咗防毒軟件就冇事，錯晒，最重要係不斷更新病毒程式，令IT罪犯不能乘虛而入。」

留意左下角網址

「大家最好清楚自己睇緊咩網站，最簡單方法，檢查吓畫面左下角條Link，係咪同你睇緊嘅網站相符。」

慎填寫個人資料

「好多網站要求填上個人資料，核實身份，填寫前最好留意該網站是否可信，另外仲要了解啲資料如何被用。」

刪除之前的記錄

「用過啲網吧、Cafe或公用電腦，記得將所有記錄刪除，IT罪犯能盜取你到過網站的資料。」