曾經畀英國《DailyMail》用「靚到不能相信」嚟形容嘅51歲美魔女羅霖（Candy），啱啱喺泰國拍完戲返港，身形比之前又fit咗嘅Candy，話今次要拍打戲好辛苦，由於全程要着皮衫皮褲拍戲，十足十足焗桑拿咁，短短十幾日已經瘦咗六、七磅。佢話：「拍打戲真係好辛苦，日日開工好似軍訓咁，而且每日全身都會濕到滴出水，但原來咁樣係一個好好嘅發洩機會，所以返嚟即刻搵老師學打拳。」

為咗認真學好，Candy專程搵咗世界級拳王兼有「風之子」之稱嘅杜恒霖（Bryan）親自教授，Bryan主要教Candy一啲打泰拳嘅基本動作，包括點樣出拳、防禦同控制力度之類，Candy話：「其實二仔都有學打拳，我都好支持佢嘅，但估唔到自己都鍾意咗，出一身汗，成個人都精神咗。」Bryan亦大讚Candy有潛質，有姿勢有實際。

今年Candy工作忙過不停，問佢幾時可以放長假休息吓？佢就話：「最快要到明年初先有機會，放到一個星期假都好好嘞，因為遲啲要做舞台劇，又要返內地做商演，暫時都冇得放假住。」