沉靜了一段時間的新股市場，近期又再度興旺，短期便有多隻新股快將上市或已經上市，最直接受惠的自然是港交所（388），有上市費收入之餘，新股亦可增加股市交投，兩者皆有利港交所。
筆者一向對抽新股的興趣平平，因為熱門而優質的新股，大都很多人爭，除非你有門路有辦法，否則即使入大飛也抽到不多。仍記得當年不少熱門股，有些朋友入大飛，惟最後僅獲發兩三手，搞到連利息都蝕埋，認真無癮。
印象較深刻的是富力地產（2777），當年市場對內房股的狂熱未至，故入飛認購的投資者不多，因而令富力當年的新股中籤率高達100%，即係申請幾多便獲分到幾多，筆者的好友在該次真是賺到笑。
筆者察覺，大戶要你出貨、沽貨畀佢，查實又幾容易，就好似筆者的好友文大狀，早前他幾經研究後，發覺忠旺（1333）質素不差，於是便在不足7元水平大量吸納，並準備作超長線持有，豈料在上周，大戶將忠旺拋兩拋，便震散了文大狀，令他急急腳沽貨獲利回吐。想不到打慣官司，見慣大訴訟，仍敵不過大戶的震倉伎倆，可見股壇真是風高浪急。
基本上，筆者認為抽唔抽新股問題不大，因為好股都唔慌會畀得多，而唔好嘅就一手都係。反而筆者會考慮待個別新股上市初期，吸納一些作長線持有。

新能源股只合短炒

翻查過往的新股表現，不難察覺，在牛市初期上市的優質新股極具投資價值，有些更有一兩倍之升幅。事先聲明，只指優質新股，其他不入此列！相信大家可能仍有印象，在數年前股市狂升時，不少朋友便曾考慮長線持有個別新股，當時市場甚至推出一些專門投資新股的基金IPOFund。
整體上，現時具長線投資價值的新股，肯定是以國內消費市場為主的，唔通買啲主攻美國市場嘅咩。其次買最好是該行業之龍頭股，綜觀過往的表現，龍頭股大都有一定基金捧場，對股價有支持。此外，該新股的市值不能太細，因為Size太細基金唔會大手吸納。
環保當然是未來數年內地的國策重點支持行業，肯定受惠，但現時在市場有賺錢能力及Size夠大的股份，真是得一兩隻。至於新能源股？基本上，翻查其他國家類似行業的發展，一般來講，這些新能源概念股在運作初期，大都要靠國家支持，甚至出錢補貼，在首數年，這類企業的盈利相對不大，亦因而間接推高其PE至數十倍甚至百倍。而在隨後數年，待企業規模不斷擴大，才達至經濟成本效益（EconomicofScales），令成本下降才有利可圖，所以不少新環保能源股初期只是流於概念而沒有真正盈利，此類股份暫不宜作長線，炒炒算了！
譚紹興
作者譚紹興為證監會持牌人士
電郵：mailto:[email protected]