【新增相片及內容】
韓劇《OH！必勝奉順英》嘅39歲女星秋瓷炫同37歲大陸男星于曉光去年初結婚，早前兩人宣佈喜訊，秋瓷炫因為陀B而退出SBS綜藝節目《同床異夢2-你是我的命運》，專心安胎。

而今日凌晨秋瓷炫順利為于曉光誕下慈姑掟，秋瓷炫所屬事務所表示秋瓷炫於首爾某醫院平安誕B仔，母子平安。

現時秋瓷炫正在休養中，雖然于曉光行程繁忙，要往返中韓兩邊，但佢都有留喺秋瓷炫身邊陪生B，一齊親迎B仔誕生一刻。于曉光之前已為愛兒改咗胎名「大海」，就係希望兒子好似大海一樣茁壯成長，亦希望孩子一直喺幸福之中，如大海般寬廣嘅心胸成長。

另外，于曉光今早喺微博晒B仔嘅腳印相，並留言：「老婆辛苦了！今天，這個世界又多了一個愛你的男孩，你們都是上天對我的恩賜！祝天下所有的孩子節日快樂！」而到中午就到秋瓷炫喺微博晒三張，當中包括B仔腳同埋佢大肚時影嘅靚相。

更多韓流，喺晒《娛果》
http://fb.com/appledailyent