當年今日

求驗客手記:搵「扒女」陪襯小豬gf索爆 - 求驗客

蘋果日報 2008/06/08 00:00


德國嘅舒韋恩史廸加正為歐國盃而忙於操練,佢拍拖冇耐嘅女友莎拉(SarahBrandner)原來一樣咁忙。「小豬」呢位18歲女友,𠵱家喺一間電視台幫手做緊歐國盃節目,莎拉靚唔靚就見仁見智喇,不過佢隔籬兩位拍檔咁「省鏡」,真係八両金企埋去都靚仔番百倍啦!
學生妹做主播
大家如果有睇過星爺嘅《唐伯虎點秋香》,就會明我求大俠講緊咩。鞏俐飾演嘅秋香,企喺一群包括石榴(苑瓊丹飾)等「豬扒女」嘅中間俾唐伯虎點,肯定即刻係全場最靚嗰位啦!
𠵱家企喺莎拉隔籬嘅,雖則唔係喺橋上回頭嘅「如花」,但係咁嘅貨色都做到節目,收視率唔知會唔會跌破新低呢?
聽講莎拉係模特兒出身,點計都叫做靚女嘅,18歲嘅佢職業仲係學生,今次莎拉幫手做歐國盃節目,應該都係同男友舒韋恩史廸加有些少關係㗎喇。有樣嘢抵讚嘅係,「小豬」同莎拉拍咗拖唔夠一年,女友就肯着住件咁「前衞」嘅連身裙犧牲色相。
歐國盃戰衣娘到爆
大家睇吓莎拉同兩位拍檔件衫想點?佢哋3個上周五喺慕尼黑出席活動,就係展示呢套專為歐國盃設計、名為「阿爾卑斯山地農家少女裝」嘅服飾。幾套連身裙都係用足球圖案包裝,其實已經夠晒「娘」;莎拉你算ok,但唔該你兩位拍檔最好戴番個面具。