識時務者為俊傑，煲呔得到中央欽點做新的特首，專出俊傑嘅香港當然馬上有反應，以前從冇讚過煲呔嘅各色人等，包括人大政協都跳晒出嚟，大讚煲呔，佢哋當中唔少都係擁董派，係咪好現實呢。
好似「飛天朱」朱幼麟咁，自從舊年被迫退出立法會選舉後已經好低調，加上佢老哥爛玩，喺國內跳滑翔傘搞到差啲冇命，所以冇蒲頭好耐，點知日前佢一見到八方，就猛話已經決定投煲呔一票，因為煲呔係叻人喎，重話香港𠵱家最需要係「能人治港」，為香港做到實事，愛唔愛國可以慢慢解決。
吓？曾幾何時，煲呔係英國人埋下嘅地雷，𠵱家忽然變成寶物？身為人大代表嘅飛天朱重慌死八方唔明解，鬼咁長氣喺度分析時局。依佢嘅「高見」，過去七年，香港最大嘅問題不在於民主派與保守派之爭，而係在於施政失敗，佢老友董建華太注重政治，忽略咗民生，結果提早收工。

同民主派老友有分加

至於煲呔，飛天朱就話佢剛好配合到中央目前高舉「溝通」同「開放」嘅新政策，因為佢比較了解民主派嘅價值觀，有利於下一階段香港嘅發展喎。咦？同民主派老友竟然有分加？
朱幼麟自認係「開明親中派」，所以佢理解傳統左派點解咁唔鍾意煲呔，一來煲呔係英國人培養出嚟，重係虔誠天主教徒，認真格格不入。不過，飛天朱話左派好快就應該知道阿爺今次大膽起用煲呔係正確嘅，佢重爆料話，其實過去幾年，中央已向煲呔做咗好多愛國工夫，好似安排佢多次返內地旅行，令佢更了解國家政策同國情。「如果我係中央領導，都會先搵個有能力嘅人，再令佢愛國愛港。」
老董另一個老友政協常委陳永棋亦向八方大捧煲呔，話佢符合晒所有做特首嘅條件，而達仔就全部肥佬，金勞詹更加係「冇資格選」㖭。希望老詹唔好嬲，要報仇搵棋哥啦。

傳真︰2623-9278
電郵︰[email protected]