政界中人皆知，立法會建制派提出修改《議事規則》阻拉布，若然通過，短期內有助高鐵一地兩檢方案明年立會休會前順利過關，長遠當然係為林鄭政府呢屆勢在必行嘅《基本法》23條立法鋪路。

唔少建制派已經預告，呢個政治任務，林鄭此屆不得不做，而西環小護法、中聯辦法律部部長王振民近期亦頻頻出動力推23條。佢今日喺港大出席港澳基本法研究會年會總結發言時就話嘞，國家主席習近平提出嘅全面管治權，來源於國家主權，並非新概念，認為中國喺97年恢復對港行使主權，就已經係恢復對港嘅全面管治權。

小護法堅稱，中央嚴按憲法同《基本法》，而非喺憲法法律之外漫無邊際行使全面管治權，會同時強調特區高度自治權喎。當然提及重點，就係特區要研究未來幾十年如何維護好國家主權同安全，包括23條立法，直言有關問題無法迴避。