陳志雲（Stephen）、毛舜筠、森美同SuperGirls等今日喺中環出席維特健靈單車活動。今朝得三度，Stephen同毛姐都只係現身支持，無落場踩單車。

不過森美同SuperGirls成員Aka抵住冷都有參加，Aka仲特登飲哂薑湯同薑飯保暖，佢話：「之前去日本名古屋做嘢，嗰邊大雪，返嚟已經有啲感冒，而家手都僵哂，一陣踩車都會小心啲。」

全副保暖套裝上陣嘅毛姐話：「頭先陳醫生（陳曦齡）話今日係四十年來最凍嘅一日，我著哂滑雪褸、滑雪褲，手套同鞋墊都可以發熱o架，係塊面有啲凍。」早前有指香港會落雪，毛姐話雖然機會好微，但如果真係落雪會即刻去玩同影相：「我會離開工作嘅地方去玩，因為真係無見過香港落雪嘛。」

至於早排被官司纏身嘅Stephen，有傳佢會過檔ViuTV，被問到可有新動向時，佢話：「話我去電視台丫嘛，絕無此事，係傳聞，我順便幫YT（俞琤）澄清埋，絕無此事，佢無特別新動向，真係退落嚟。就算將來佢工作，都唔係為賺錢，有回報都會捐返出去，佢係想為公益。」

但係話你會跟埋YT走喎。Stephen話：「唔會，我上任商台行政總裁嗰陣，講過唔止一次，大家唔信，其實YT做副主席嗰陣，已經無參與商台工作好耐。」

咁有無其他電視台接觸你先？Stephen好風趣咁話：「我開電視就有接觸now。」佢話而家喺商台工作好愉快，同事又好好，而已管理層都好支持自己，繼續喺商台任職，同係咪仲有合約無關。

之前因為官司問題，Stephen由商台行政總裁轉任首席智囊團，而家官司告一段落，會唔會做返CEO先？佢笑謂：「我唔係假做智囊架，係真係退落嚟，無再上去呢個預算，對於而家嘅工作範疇同崗位好開心。」