無綫前總經理陳志雲將倒戈為翻生嘅亞視主持全新一輯《百萬富翁》，聽日亞視就會開記者公佈詳情。其實志雲除咗繼續主持商台節目外，下個月18至21日重會同前港台DJ倪秉郎喺尖沙嘴文化中心劇場演出5場舞台劇《主席萬歲》，身兼多職嘅佢真係有排忙。由於舞台劇反應熱烈，劇團「劇場空間」決定加開21日夜場，加場門票聽日正式發售。

日前志雲同倪秉郎喺新蒲崗為舞台劇綵排，志雲喺劇中扮「老翻毛澤東」、飾演一名戲癡嘅報販「陳四茂」，倪秉郎扮演臨記阿頭「白俊奇」，故事講述佢哋返大陸拍電影，但飾演毛主席嘅演員突然死咗，於是搵咗陳四茂頂替，由於扮得太神似，所有村民對佢極之崇拜，真係「真的假不了，假的不得了」。

志雲笑指：「我係扮1928年嘅毛主席，即係《建軍大業》劉燁飾演嘅毛主席，我聽到係非常樂意接受呢個挑戰。」倪秉郎笑問：「如果叫你飾演唐國強嗰個版本嘅毛主席就唔得？」陳志雲即刻落閘：「咁咪要增肥？你知我嘅終身事業就係減肥，所以我係一個唔係好專業嘅演員。」

倪秉郎話毛主席唔係主角，但睇劇名會令人幻想到跟政治有關，倪秉郎解釋：「呢套劇係講兩個嘅友情，現實生活嘅真假，不過我哋借毛澤東同蔣介石嘅關係演繹成個故事。」至於宣傳海報上，陳志雲食飯盒，倪秉郎要燒道具銀紙，陳志雲話：「呢張海報出到街，真係唔容易。」係咪因為張道具錢似人民幣？佢哋話：「唔知，我諗係銀紙都唔得，不過呢張銀紙唔係咩人民銀行，係寫劇場空間；同埋點睇都唔係錢，個樣點睇都唔係咩政要啦，我諗係可能同火有關，怕人哋會學，你睇下我哋嘅地下鐵路（港鐵），呢啲咁細微都要睇埋，好似我哋排戲咁認真，不過o依家出到。」

志雲指部戲係超搞笑：「只係反映到香港電影嘅發展史，但一啲都唔係嚴肅處理。」雖然冇涉及政治成份，但陳志雲重溫《毛語錄》，發現有好多金句幾有意思：「我覺得『最大嘅資產就係冇資產』呢句絕，呢套劇有句對白『世界上沒有無緣無故的愛，也沒有無緣無故的恨』，毛主席講㗎！我憎你係有原因，我愛你亦都有原因，對於現屆政府，如果你話要有政治意識，點解人民對政府咁抗拒，我諗唔會無緣無故囉！」倪秉郎認真問：「係咪要請政府高官嚟睇？」志雲話：「你唔好咁講，人哋以為我哋帶有政治訊息呀，邀請咗人，人哋最後推呀，我哋係有邀請，亦應承會嚟。」

雖然話唔牽涉政治意識，不過志雲話可以藉住呢套劇，可對共產黨加深少少了解，唔怕太敏感？佢話：「唔敏感，為咗慶祝香港回歸20周年，為咗慶祝國家實施憲法35周年，特區都舉辦咗一啲嘅特別講座，中聯辦同我哋講解咗唔可以愛國就唔接受共產黨，因為中華人民共和國憲法中，係寫明由共產黨領導，但係根據港區全國人大代表葉國謙講『你可以愛國唔愛黨，但不能不接受黨』，我覺得既然你接受黨，你就要令人明白個黨，今次睇完《主席萬歲》，我諗唔多唔少可以明多少少，起碼喺《毛語錄》裏面，嗰幾句金句係了解多一啲，毛主席思想係點，可以了解人民心目中嘅毛主席係點。」

更多娛聞，喺晒《娛果》
http://fb.com/appledailyent