李珊珊與江漢曾於《烈火雄心》合作過，她昨晚在微博發文表示惋惜：「永遠懷念，江漢叔。」

《蘋果》致電珊珊，問到她和江漢合作經過：「其實講合作，最深刻係《烈火雄心》嘅時候，因為大家對手戲比較多，同佢合作時候佢都係前輩，我啱啱入行，見到啲長輩都會戰戰兢兢，但係就係非常溫暖。江漢叔平時會突然間帶啲歡樂畀大家，令到大家好開心，喺我心目中佢係好好人，所以聽到呢個消息心裡面有啲唔舒服，希望佢好開心去另一個地方，永遠懷念佢。」

珊珊又回憶謂：「有場戲講江漢叔俾鄭子誠整到心臟病，激親之後癱咗唔方便，嗰場戲要佢用擔架(步行器)慢慢行入房，然後呢，導演有要求，拍咗第一個take，就話：『江漢叔，可唔可以行快少少？時間上唔係好容許』，江漢叔話：『好！』，導演有咁嘅要求，佢咪配合，第二個take，佢拎起嗰步行架，就咁行入去，全部人都會爆笑。」這場戲飾演江漢叔兩子的古天樂和鄧一君都有出場。

「江漢叔間唔中整吓呢啲幽默去緩衝吓大家，你知一日場十幾場戲，又攰又盛，間唔中有啲咁嘅歡樂，令到大家都幾精神吓，又幾開心吓，同埋團體合作嘅嘢，有時有啲人會有好多要求，但江漢叔係唔會有呢啲咁嘅要求，或者間唔中須要有長輩出聲，可能佢會講一句『不如咁啦』，就令到件事更圓滿，或者可以解決咗，江漢叔係我心目中係一個好好長輩。」

李珊珊表示江漢叔是其中一位無綫長輩有深刻印象，對於有不少資深演員相繼離世，她都感慨謂：「希望公司重視呢啲演員，因為每一個演員將自己青春、自己歲月交咗畀公司，喺唔同年齡層嚟講，都會有佢發揮嘅功用，都係不可多得，所以希望公司重視每一個唔同年齡層嘅演員。尤其是蝦叔（關海山）走咗，江漢叔又離開咗，其實唔好有斷層，每一個演員都好重要，係公司嘅財富嚟。」

相關新聞：
【江漢離世】《烈火雄心》演父子 古天樂：我真係當佢係老竇
http://bit.ly/2jeJMqv

【專演慈父大商家】無綫資深藝員江漢昨晚離世 享年78歲
http://bit.ly/2kH26sK

【1959年入行】江漢92轉投無綫 國語片當紅小生變電視台實力演員
http://bit.ly/2jy2fey

【享年78歲】江漢愛子心切曾誤墮電話騙局 險失20萬
http://bit.ly/2AGB1K4