今日係天后梅艷芳嘅死忌，一班梅姐嘅歌迷今晚喺石塘咀山道天橋底舉行電影《胭脂扣》欣賞會，吸引到接近200名Fans現身，《胭脂扣》當年就係喺石塘咀附近取景，今晚仲有當年電影導演關錦鵬現身，係晚上8點15分關導現身，對於重臨當年拍攝場地，佢話：「其實自己住附近，我成日都會行過呢度，對我嚟講梅艷芳其實唔係走咗，只係移咗民去一個好遠嘅地方，唔係經常返嚟。」

關導又話其實《胭脂扣》咁多年嚟都喺唔同嘅場合都播放過，大家都仍然係會記住張國榮同梅艷芳，問到當年拍攝嘅點滴？佢話：「其實趣事真係冇乜，反而好記得梅艷芳對角色嘅投入同埋認真嘅處理，當年我記得啱啱有playback，佢係有一種能力令到所有人都蹲住睇佢嘅playback。」

主辦今次活動嘅梅艷芳國際歌迷會會長蘇小姐就表示，今次活動事前已經同政府申請：「今次有好多義工幫手，等活動可以順利舉行。」講到明年就係梅姐去世15周年，會唔會有一啲特別嘅活動？蘇小姐話：「完成咗今晚活動後，我哋就會開始傾去籌備。」