爵士接受冊封，中國領導人傾巢而出，吳儀、唐家璇、港澳辦官員等團團圍壓，話高規格又得，話係施壓又得，反之爵士一方得個詩姑同林D9，寡不敵眾。
壽爺握手，點止十一秒，一百一十秒都有！壽爺話爵士高票當選，佢要寄以「期望及祝福」！點知在胡之前，溫寶寶召見，就講咗「期望比祝賀更重要」，即是話：做呢個位，冇感情講，以後要交貨！
跟住溫寶寶又吟詩：「士不可以不弘毅，任重道遠」！搞到特區反智界齊齊查出處！溫寶寶講嘢一向棉裏藏餡，話中有話。「士不可以不弘毅」呢句說話唔係講畀爵士聽，而係自己發牢騷。士，即是知識分子，爵士係公僕、港英餘孽兼政治家，不過就唔係知識分子，咁呢句說話彈畀爵士又點啱嘴形？

「弘毅」有火藥味

溫寶寶自己就當正係知識分子，又林則徐又泰戈爾，不過聽講佢最近唔係好手風順，上海房地產㩒唔住，「士不可以不弘毅」，即是有人想阻住佢「弘毅」咁解，呢幾個字裏面有火藥味，與爵士及香港問題無關！
跟住嗰句「任重道遠」，暗示自己呢個位，綁住好多包袱鎖鏈，亦暗示爵士，若然「任重」而交到成績，咁就可以「道遠」做夠十二年，今次爵士執到嘞！
溫寶寶講嘢，唔淨止講畀六百萬香港人聽，亦有啲密碼心事向十三億人吐露！唔好以為乜都以香港為中心，煲呔上去領出世紙，溫寶寶就一定評論晒香港事務咁簡單！爵士份工唔易撈，國務院總理個位亦一樣唔易捱，不過爵士你就好喇，每個月幾十萬，又有英國皇室汽水蓋，有乜唔掂可以劈炮，做總理嘅就唔係嘞，你睇趙紫陽幾淒涼？

曾爵士要識執生

所以下次爵士見到溫寶寶，當寶哥哥話：「人生自古誰無死，留取丹心照汗青」，咁佢就好醒扒，自己未必使遞信，反為係寶哥哥向佢道別咁解，執生嘞當奴！

傳真︰2623-9278
電郵︰[email protected]