韓流天王Rain今年1月同拍拖多年嘅女星金泰希拉埋天窗，更於上月宣佈金泰希懷孕15周嘅喜訊。

現時Rain除了密密搵奶粉錢外，亦要悉心照顧陀B嘅愛妻，今年3月Rain落實出演由綜藝節目《超人回來了》嘅李凡秀首次擔任電影製作人嘅作品《嚴福童》，佢為咗全神演繹日本殖民時期喺亞洲各大自行車賽事嘅傳奇運動英雄嚴福童呢個角色，早前已密密進行單車訓練，非常專業。

近日李凡秀接受傳媒訪問時仲踢爆Rain為咗呢部電影竟然推咗荷李活巨片嘅一角，認真唔話得，根據李凡秀受訪時話Rain原本有份參演新一齣《變種特攻》（X-Men）系列，並預計下月開拍，但因為Rain要拍攝《嚴福童》拍到8月份，所以Rain為咗專心拍《嚴福童》，所以最終推咗《變種特攻》，李凡秀直言非常感激Rain，大讚佢擁有專業態度。

Rain早於2008年已出演荷李活影片《極速賽車手》（Speed Racer），2009年更擔正做主角出演西片《忍者刺客》（Ninja Assassin）。