日本男星成宮寬貴上月被爆疑有毒癮，隨時宣佈引退，並聲言遭信任嘅朋友設陷阱出賣。爆料人A先生同成宮寬貴交情唔簡單，事後開Twitter又受訪繼續爆料，佢表明自己係成宮與毒犯之間嘅中間人，自己冇份吸毒，爆料目的係想成宮戒毒。

正當近日有傳成宮寬貴最快半年之後會復出，可能會透過演舞台劇重新出發之際，A先生再公開與成宮寬貴合照，同一段疑似兩人嘅對話內容，A先生：「好遺憾，好想睇吓Hiroki（寬貴）對自己嘅工作抱住幾多熱誠。」對方就回復：「想要幾多錢？你開個價。」由於對話內容顯示喺11月，似乎係A先生向雜誌爆料前，同成宮寬貴嘅對話內容。對於A先生再度爆料，網民傾向鬧爆A先生行為可恥，反而同情成宮寬貴。