這天沙田馬場上演全年終極戰，頭兩場都由洋將大熱馬勝出，分別係雷神「喜威威」同柏寶「神威福將」。跑到第三場四班1800米，本來都好機會再開熱Win，不過梁家俊同李易達合作「金叻星」卻做程咬金，半條直路後上衝贏次熱「安闖」，「金叻星」爆43倍冷Win，打開今季勝門，組合獨贏開A3派23元正，「安闖」力拼屈居亞軍，始終開唔到齋，亦令馬主王賢訊唔可以為家族繼上次日賽爆大冷贏「大將風馳」後再下一城。
今場三、四名順序係落飛馬「開心健康」同冷門「金領宙」，四重彩派14.1萬多元。
「金叻星」之前最長只贏至谷草1650米，上季三捷大爆發，馬主金財富團體成員之一包括幟哥黃永幟，今場佢另有團體馬「搖錢樹」出賽，結果冷啲嗰隻「金叻星」勝出，「搖錢樹」則只得第八。李易達今個月贏咗「匯聚力量」、「金筷子」、「金叻星」三Win，成績顯著冒升，但仍欠9Win才達15Win達標。
賽後李易達與太太、子女及表姨甥共四位年輕小朋友一起拉頭馬。他說：「『金叻星』今場集多個有利條件於一身，例如檔位好、負輕磅，加上此馬一直都表現穩定，只要形勢有利就會交出應有水準，馬兒評分下調至有利水平，也是今仗取勝關鍵之一。梁家俊發揮出色走位得宜，當然也應記一功。」