當年今日

  唐家璇南下送貨 - 李八方

蘋果日報 2003/05/07 08:00


由胡錦濤同溫家寶領導嘅中央人民政府坐言起行,以董建華為首嘅特區政府一開口,抗炎防護物品就即時運到,明早喺皇崗口岸交收,聽講有成四十萬件保護袍、二十萬個眼罩以及一百萬個口罩。
祖國派出國務委員唐家璇及全國政協副主席兼港澳辦主任廖暉南下主持交收儀式,董建華則北上接收。八方想起中央台日日話北京疫情嚴峻,保護物資短缺,要各省市支援,而胡溫仍要先救特區,真令人感激。
如此令人感動之交收儀式,豈容錯過?可惜主人家並冇預《蘋果》去採訪。呢個當然係歷史遺留嘅問題,不過𠵱家新人事新作風,溫總理喺泰國搞到啲香港記者心服口服,佢一臉正氣,大義凜然,應該不會怕一個小小的《蘋果》記者。八方入咗申請表,正候佳音。
﹙圖﹚老董聽日去接收中央嘅「賞賜」,八方都好想跟埋去做見證,唔知批唔批呢?



傳真︰2623-9278
電郵︰[email protected]