當年今日
關於我們

【死亡筆記】袁立加入戰線 崔永元預告手握《手機2》男主角黑材料

蘋果日報 2018/06/12 17:14

手機2崔永元袁立

馮小剛要開拍《手機2》,又觸動到前央視主播崔永元神經,因為男主角「嚴守一」係以佢做藍本,故事又拍到嚴守一個形象唔多好,所以老崔點會唔嬲,開始佢嘅復仇行動,而且佢並不孤單,因為大陸女星袁立都加入佢陣營,同佢一齊聲討投資呢部戲嘅華誼兄弟公司。
噚日華誼公司俾人踢爆,兩位主要股東王中軍同弟弟王中磊都將手頭上嘅華誼股票押晒俾銀行,中軍手裡僅剩2.21%嘅股份,細佬中磊只剩番1.04%,有人擔心佢兩兄弟瘋狂套現動機。
崔永元喺微博寸爆華誼兄弟:「買這隻股票的可以哭了!」不過華誼噚晚有澄清股權質押係常見投資形態,而袁立都嚟湊熱鬧,直接微博發話唔明佢兩兄弟嘅解釋:「甚麼意思?不懂!」之後又連續轉發好幾條關於華誼質押股權嘅新聞的微博。
到噚晚10點幾,崔永元又喺微博留言暗示有《手機2》主角之一范偉嘅材料:「范偉老師,不好了,我家鏟屎官……看到你的材料了。」今日《蘋果》聯絡過崔永元,問佢可唔可以詳細講吓,到底揸住范偉乜嘢材料?佢話:「不急!」謂適當時候會發布,之前佢已講過,手握呢部戲主創人嘅材科,甚至會有人因此而坐監,睇嚟范偉有排瞓唔著。
講番44歲嘅袁立,做乜呢輪咁撐崔永元呢?原來係因為佢同王中軍有恩怨。話說佢十幾年前喺王中軍手中買咗一副價值30萬嘅畫同一件15萬嘅雕塑。後來佢想重新拍賣,拍賣行告知藝術家謂根本冇做過呢件藝術品。袁立大怒,指摘王中軍係騙子,王中軍發聲明話藏品係真嘅,兩人爭持不下,但袁立話件貨就係賣唔出去,所以佢要鬥爭到底!
袁立畢業於北京電影學院表演系,2000年拍嘅電視劇《鐵齒銅牙紀曉嵐》,劇中飾演紀曉嵐嘅紅顏知己杜小月,深得觀眾喜愛。袁立個性率直剛烈,喜據理力爭,05年同內地演員趙嶺結婚,07離婚,到2011年與雷曼布希公司的CEO林博文(Blaine Grunewald)結婚,15年離婚,依家又回復單身。
精選娛聞,喺晒《娛果》
http://fb.com/appledailyent
empty
empty
《手機2》在南京續拍,前晚馮小剛、劉震雲同張國立收工後相聚。(互聯網圖片)
empty
崔永元喺微博預告有范偉材料喺手,誓不罷休。(互聯網圖片)
empty
《手機》(上圖)15年前開拍賣座,上個月續集原班人馬出席開機禮!(互聯網圖片)
empty
王中軍同王中磊兩兄弟最近幾乎將華誼公司股份全部押出去,惹來市場震動。(互聯網圖片)
empty
魏小明以工作照力證袁立所收嘅藝術品出自佢手藝,但好明顯兩件雕塑是不一樣。(互聯網圖片)
empty
(互聯網圖片)