銀行最近推出40年按揭計劃，有專家大力讚好，話可以兩代人接力去供，增加上車機會。唐牛睇到眼都凸埋，呢個世代供樓已經非常辛苦，如果禍延下一代，香港人遲早變晒樓奴；下一代連自己都未必養得掂，點可能孭得到樓債。其實將供樓年期越拉越長，風險只會越嚟越高，自問未夠實力嘅，千祈咪夾硬上車，隻狼咁鍾意講大話，呢頭話唔會推冧樓價，轉頭唔知會做啲乜，都係小心啲好。
講開買樓，唔少得添置傢俬，噚日傢俬股異動，其中皇朝傢俬（1198）抽高5.8%，成交大增逾兩倍至5球，今日應有力衝破5月延伸嘅下降軌。北京近日正式推出家具以舊換新政策，商務部講明會積極支持，進度好會全國推行，屆時皇朝銷售肯定以幾何級數上升。講估值，皇朝現價PE僅4.8倍，比敏華控股（1999）折讓五成，上升空間更大，以今年跌浪反彈0.382倍目標計，可見1.88元，潛在升幅28%，屆時PB都未夠1倍。

唐牛