當年今日
關於我們
【要爆啦】搞形象不如踢好波 摩佬隨時貶普巴
蘋果日報 2017/03/31 14:51
曼聯
摩連奴
伊巴謙莫域
保羅普巴
如果普巴個emoji係自己樣,摩佬個emoji肯定係憤怒鳥!
曼聯喺周六英超迎戰西布朗,但保羅普巴早前喺歐霸盃16強次回合腿筋受傷,今場肯定缺陣,佢亦都非常生性,喺社交網站上載舉鐵片段,似乎好有心想盡快重返賽場喎。不過,呢位法國中場今季嘅表現暫時未配得起一億歐元身價,英國《每日鏡報》更指,領隊摩連奴越嚟越不滿佢喺場外嘅高調作風,整完twitter emoji又跳pogbance,就算對外維護愛將,但對內都同佢講明要減少商業活動,否則隨時貶佢坐冷板咁話!
另外,呢場繼續停賽嘅射手伊巴謙莫域,離隊傳聞仍然停不了,其中轉戰美職聯嘅呼聲有增無減。摩佬日前接受英國《天空體育》訪問時,就擺出一副「你快樂所以我快樂」嘅姿態:「我只係冷靜以對,等待佢嘅決定。如果佢決定留隊並感到快樂,我哋當然高興;如果佢決定離隊嘗試新挑戰,我哋都會為佢高興。」