莫雷拉正氣，今期（25日）座騎比起剛周三（21日）質量都要好，頭場接手「幸運坊」，且看可否為差兩場達標的鄭俊偉，進一步靠近安全線；馬房同日另有「超然」，以及第八場三路興兵，反映目前戰意應超強。

第一場五班草地1400米：「幸運坊」與今季不少鄭廐馬相似，演出較失準，好起來，可如大前仗快步速跟得急頂到尾，僅不敵「齊齊健康」，差起來可像近兩場般，完全無料到！

今次博牠理由，換莫雷拉是一大原因外，加眼罩、唞近兩個月也是變數，早前試濕泥閘表現似無特別，然而早段、尾段都無見側頭，覺得比前集中；只要落場能交出應有水準，絕對有力爭勝。

第九場二班泥地1200米：「添好運」流鼻血休戰五個半月復出，自四月回復正常準備後，最近試兩課泥閘走勢課比課好，縱可能未返到最佳水平，然而有充足體力，用潘明輝負超輕磅，又可前置，秤條件仍覺有賺無蝕，可博。

「一哥」今季表現超穩定，落場幾乎例衝一段勁，這次換配備，以及屬近期休息期最短一次，望能多頂一場。