近日因為發展局局長陳茂波（新亞會計77）與太太許步明（新亞財務78）之新界農地事件，市面鬧得沸沸揚揚，一位新亞小師妹在立法會公聽會指罵陳茂波，以基督徒及新亞學生身份，罵基督徒、新亞師兄局長違背基督教義，不懂新亞誠明校訓；陳茂波接過小師妹鞠躬向他送出的聖經後，看似激動，坐低用三分鐘指定時間回答新界東北發展問題後，要求發展事務委員會主席謝偉銓多給他兩分鐘回應小師妹，謝偉銓着他盡量精簡。基督福音左丁山唔識，但局長一講「山巖巖，海深深，地博厚，天高明，人之尊，心之靈，廣大出胸襟，悠久見生成。」之後又多講一段：「艱險我奮進，困乏我多情。」左丁山睇電視直播，就高叫一句：弊，因為局長明顯心情波動，超時階段仍要借新亞校歌以明志，顯然對新亞校歌背後之涵義，一生人上身上腦，抵唔住頸要回應，但必然會惹來更多辱罵對佢不利。
事情發展果然如此。前中央政策組顧問、曾特首智囊之一劉細良（新亞歷史88）就唱一句校歌「千斤擔子兩肩挑」，「挑」字特別加重語氣，挑得大聲的，其他一眾新亞畢業生如學者馬嶽（新亞新聞87），評論員蔡子強（企管88），吳志森（生物82）大罵茂波引用校歌，三位立法會議員麥美娟（工聯會，英文93），鄧家彪（工聯會，新亞社會01）及缺席會議最多嘅梁家騮（新亞醫學86）就唔出聲。茂波之培聖中學及新亞師弟前議員張文光（經濟78）就不勝唏噓咁話。當然，擔大旗鋤得茂波最大力嘅就係由兩位新亞校友擔大旗嘅蘋果日報總編輯張劍虹（新聞83）及執行總編輯陳沛敏（工管92）、新亞不少新聞界校友大概對茂波愛之深，恨之切，你乖乖地跪低啦，仲夠膽背誦校歌，係要繼續奮進，仲唔鋤多呢幾嘢？陸離（新亞中文61）及小思（新亞中文64），聽講話都會寫文章批一批喎，記者來問新亞精神，左丁山請佢地訪問唐君毅、牟宗三兩位大師嘅弟子岑逸飛（新亞哲學70），最好搵埋李天命（新亞哲學68）一齊講。如記者搵唔到，香港電台嘅講東講西節目由劉天賜（新亞哲學74）主持，賜官大有資格搵齊岑逸飛、李天命兩位師兄講新亞啫！

今晚11點，【一句到尾，《亂噏24》！】
蘋果網站動Live 預埋你。
http://hk.apple.nextmedia.com/livestream/channel/talk24