NBA一哥勇士喺上周六常規賽，憑住「浪花兄弟」同祖蒙特格連（Draymond Green）打出好表現，以115:112險勝快艇。
勇士上周五雖然慘敗畀拓荒者，但係喺back-to-back作客快艇已經調整好狀態，「浪花兄弟」史堤芬居里（Stephen Curry）同K湯遜（Klay Thompson），分別攻入23分同32分，再加上祖蒙特格連（Draymond Green）喺今季第11次拎到「大三元」，最終險勝三分，避免喺今季首次連輸兩場。

韋確斯最後一擊air ball

「咖喱仔」都好滿意球隊嘅表現，佢賽後表示：「我接受球隊可以好似上場咁輸波，但係我哋要盡快調整狀態，搵方法去贏一隊強隊，而且我哋今場都冇藉口再輸！」勇士今場有五個人得分達雙位數，加上命中率高達51.2%，拎到全場最高分嘅「浪弟」K湯遜都話：「我為球隊感到驕傲，我哋今場證明上場輸波真係一個意外。」
快艇嘅當家球星基斯保羅（Chris Paul）喺第四節初段傷出，唔少人都以為佢哋輸硬，不過一班後備球員喺最後兩分鐘打出一段13:0嘅攻勢，差啲可以扳平；可惜CJ韋確斯（C.J. Wilcox）最後1.6秒喺三分線外出手竟然air ball。教練李華士（Doc Rivers）都忍唔住話班球員唔夠耐性：「班球員好急躁，太想贏波反而令到表現失準。」