「內地奇葩」干露露，同露露阿媽露到出晒位，月頭仲嚟埋香港，佢哋聲稱係斟拍蕭定一嘅《4D肉蒲團》，仲著咗件超透視裝落蘭桂坊，測試水溫。

唉，點知，真係冇陰功，干露露一返北京就「出事」，有網民PO咗佢喺一間Cafe畀人打嘅相，聲稱係畀正印當場捉姦狂毆，仲有傳經理人回覆話佢情況唔樂觀喎！又會咁啱俾人打嗰刻影到相，仲要影得咁清楚喎，兼夾話狂毆……睇相又唔覺，但已經報稱「情況唔樂觀」。

係咪炒作？自行判斷啦。而且內地藝人次次俾人摑，次次都咁啱有網民影到相擺上微博tag埋名，是真是假，自己估喇。

講番干露露，無耐之後，又傳話干露露當日畀人打到毀容，戴住口罩同干媽媽齊齊去醫院，咦……又俾人影到。聽聞佢擦損塊面啫，個胸無事，鼻亦冇甩到，磨下皮就搞掂!不過最離奇係，佢嚟香港聲稱係斟拍《4D肉蒲團》，但蕭定一受訪話: 「上次佢嚟香港，我都冇見過佢!」 同埋只係搵佢客串下仲啫。

最正都係蕭定一話，佢一啲都唔擔心佢毀容拍唔到戲，因為佢知係假嘅！